পেট্ৰাৰ পুৰণি নাম আছিল ৰেকেম। পেট্ৰা আৰামীয় ভাষা কোৱা ছিমেটিছসকলৰ নাবাটিয়ানৰ ৰাজধানী আছিল বুলি জনা যায়। ই মৰুভূমিৰ বণিকসকলৰ বাণিজ্যৰ কেন্দ্ৰ আছিল বুলিও জনা যায়। সুউচ্চ পৰ্বতে আবৰি থকা পেট্ৰাৰ পানীৰ চাহিদা পূৰণ কৰিছিল ইয়াত বাৰমাহে পানী থকা এটা জুৰিয়ে। ইয়াক আৱৰি থকা পাহাৰবোৰে পেট্ৰাক এটা সুৰক্ষিত দুৰ্গলৈ পৰিণত কৰিছিল। পশ্চিমে গাজা, উত্তৰে বছৰা আৰু ডামাস্কাছ, মৃত সাগৰৰ আকাৰা আৰু লিউচ কম আৰু পাৰস্য উপসাগৰৰ মৰুভূমিলৈ যোৱা ইয়েই আছিল একমাত্ৰ বাণিজ্যিক পথ।
খনন কাৰ্যৰ পৰা জানিব পৰা মতে নাবাটিয়ানসকলে এক কৃত্ৰিম মৰুদ্যান স্থাপন কৰি পানীৰ নিয়ন্ত্ৰণ কৰিছিল। ইয়েই এই সৰু মহানগৰীখনৰ উত্থানত সহায় কৰিছিল। অঞ্চলটোত বৰষুণৰ পানীয়ে বানৰ সৃষ্টি কৰিছিল। কিন্তু নাবাটিয়ানসকলে জলাধাৰ, বান্ধ, নলা নিৰ্মাণেৰে বান নিয়ন্ত্ৰণ কৰিছিল।
পৌৰাণিক কালত পেট্ৰালৈ দক্ষিণ দিশৰ পৰা অথবা উত্তৰ উচ্চ সমভূমিৰে পেট্ৰালৈ অহা-যোৱা কৰা হৈছিল বুলি অনুমান কৰা হৈছে। কিন্তু বৰ্তমানৰ পৰ্যটকসকলে পেট্ৰালৈ পূব দিশেৰেহে যায়। পূব দিশত এটা আন্ধাৰ তথা সংকীৰ্ণ গিৰিপথেৰে ইয়ালৈ যোৱা হয়। এই গিৰিপথটোৰ নাম হ'ল ছিক।
পেট্ৰাৰ ইতিহাস নিৰ্দ্ধাৰণ কৰাটো বৰ সহজ কাম নহয়। পেট্ৰা পৌৰাণিক কালতে স্থাপন কৰা হৈছিল বুলি অনুমান কৰা হৈছে। পেট্ৰাৰ বিষয়ে অ'ল্ড টেষ্টামেনতো উল্লেখ আছে। সাধাৰণতে সেই সময়ত পেট্ৰাক ছেলা বুলি কোৱা হৈছিল, যাৰ অৰ্থ হ'ল শিল। কিন্তু ছিমেটীয়সকলে এই মহানগৰীখনক কি বুলি নাম দিছিল, সেই বিষয়ে সঠিকভাৱে জনা নাযায়। বহুতে ইয়াক ৰেকেম বুলি কয়, কিন্তু আৰামীয় ভাষাত কাদেস্কৰ নামহে ৰেকেম। কেতিয়াবা আৰামীয় ভাষাত ৰেকেম গেৱা বুলিও উল্লেখ কৰা হৈছে। কিন্তু ই দক্ষিণ পশ্চিম পেট্ৰাৰ ইল-জিকহে বুজায়। কিন্তু সমীপৰ স্থানৰ নামেৰে ৰাজধানীখনক মতা হ'ব বুলি মনে নধৰে। যদিহে ছিমেটীয়সকলে মহানগৰখনক ছেলা বুলি কোৱা নাছিল তেন্তে ইয়াৰ পৌৰাণিক নাম জনাৰ উপায় নাই।
ইয়াত নাবাটিয়ানসকলৰ অৱস্থিতিৰ বিষয়ে হয়তো জানিব পৰা যাব, ইয়াত থকা সমাধি সৌধবোৰ চাই। পেট্ৰাত দুইধৰণৰ সমাধিসৌধ দেখা যায়- নাবাটিয়ান আৰু গ্ৰীক-ৰোমান। নাবাটিয়ান সমাধি সৌধবোৰত তোৰণ আৰু স্তম্ভত মণি-মুকুতাৰে সজোৱা মুকুট দেখা পোৱা যায়। নাবাটিয়ান সভ্যতা খ্ৰীষ্টপূৰ্ব ষষ্ঠ শতিকাৰ পিছৰ নহয় বুলিও কোৱা হয়। আনহাতে ইয়াত গ্ৰীক, ইজিপ্ত আৰু ছিৰিয়ানসকলৰ আধিপত্য থকা সভ্যতাৰ বিষয়েও উমান পোৱা যায়। ই টলেন্সীৰ সমসাময়িক বুলি কোৱা হৈছে। আনহাতে ইলেমিক আৰু চেলুচিভ ৰাজতন্ত্ৰ দুৰ্বল হৈ পৰাৰ সময়তে নাবাটিয়ানসকলে মূৰ দাঙি উঠিছিল। সেয়া খ্ৰীষ্টপূৰ্ব দ্বিতীয় শতিকামানৰ কথা। পেট্ৰাত এৰেটাছ-৩য় ফিলহেলেনৰ দিনতে মুদ্ৰাৰ প্ৰচলন আৰম্ভ হয়। আনহাতে ইয়াত চলোৱা সময়ৰ পৰা পেট্ৰাত গ্ৰীচীয় সংস্কৃতিৰ বিষয়েও উমান পোৱা যায়। ১০৬ খ্ৰীষ্টাব্দমানত কৰ্ণেলিয়াছ পামা ছিৰিয়াৰ শাসক হৈ থকাৰ সময়তে পেট্ৰা ৰোমান সাম্ৰাজ্যৰ অংশ হৈ পৰে আৰু তেতিয়াই তাত স্থানীয় শাসনৰ অন্ত পৰে। নাবাটিয়ানসকলে আৰবত ইছলাম ধৰ্ম প্ৰৱৰ্তন হোৱাৰ আগৰ সময়ছোৱাত দেৱ-দেৱীৰ পূজা কৰিছিল। কেতিয়াবা একোজন শাসককো দেৱতাৰ মৰ্যাদা দি পূজা কৰা হৈছিল। এইক্ষেত্ৰত বিখ্যাত আছিল অব'ডাছ-১ম। তেওঁলোকৰ মূল দেৱতা আছিল দুছাৰা যাৰ লগত তিনিগৰাকী দেৱীও ক্ৰমে উজ্জা, আলাট আৰু সানহো আছিল। পেট্ৰাত দেৱ-দেৱীৰ শিলত কটা ভালেমান মূৰ্তি দেখা পোৱা যায়। চতুৰ্থ শতিকামানত পেট্ৰাত খ্ৰীষ্টধৰ্ম প্ৰচলিত হয়। আনহাতে ৬২৯-৬৩২ খ্ৰীষ্টাব্দৰ ভিতৰত পেট্ৰাত ইছলাম ধৰ্ম প্ৰৱৰ্তন হ'বলৈ ধৰে। প্ৰথম ধৰ্মযুদ্ধৰ সময়ত জেৰুজালেম সাম্ৰাজ্যৰ আল-কাৰাকে পেট্ৰা দখল কৰিছিল।
ৰোমানসকলৰ শাসনৰ সময়তে পেট্ৰাৰ পতন আৰম্ভ হয়। ৩৬৩ খ্ৰীষ্টাব্দত হোৱা এক ভূমিকম্পয়ো পেট্ৰাৰ ক্ষতিসাধন কৰে। বৰ্তমান ই পৰ্যটনস্থলীলৈ পৰ্যবসিত হৈছে। ১৯৮৫ চনৰ ৬ ডিচেম্বৰত বিশ্বৰ ঐতিহ্যমণ্ডিত স্থানৰূপে ঘোষণা কৰাৰ পিছত ২০০৬ চনত জৰ্ডান চৰকাৰৰ তত্ত্বাৱধানত ইয়াত এটা পৰ্যটন কেন্দ্ৰও খোলা হয়।
0 comments:
Post a Comment